இணைந்து இருங்கள்

ரஜினியின் சுல்தான்!
'சிவாஜி' படத்தின் சாதனையை முறியடிக்கும் வகையில், ரஜினியின் 'சுல்தான்' படத்தை 1,200க்கும் மேற்பட்ட திரையரங்குகளில் வெளியிடுகிறார்கள்.உலக அளவில் வசூலில் பல சாதனைகள் படைத்த சிவாஜிக்குப் பிறகு சூப்பர் ஸ்டார் ரஜினி நடிக்கும் படம் 'சுல்தான்–தி வாரியர்'. இந்தியாவை ஆட்சி செய்த சுல்தானாக இதில் நடிக்கிறார் ரஜினி. வரலாற்றுப் படம் என்பதால் சுல்தானை மிகுந்த சிரத்தையுடன் உருவாக்கி வருகிறார் ரஜினியின் இளைய மகள் செளந்தர்யா.ஏ.ஆர்.ரஹ்மான் இசையமைக்கும் இந்தப் படத்தின் முதல் கட்டப் படப்பிடிப்பு பெல்ஜியம், பிரேஸில், ஜெர்மனி, அமெரிக்கா உள்ளிட்ட நாடுகளில் ஆறு வாரங்கள் நடந்தது. முதலில் ரஜினியை நடிக்க வைத்து பின்னர், அந்தக் காட்சிகளை அனிமேஷனுக்கு மாற்றும் வேலைகள் இதுவரை செளந்தர்யாவின் ஆக்கர் ஸ்டுடியோவில் நடந்தன.இப்போது, படத்தின் இறுதிக் கட்டப் படப்பிடிப்புக்கு தயாராகி வருகிறார் செளந்தர்யா. இதுவரை படமாக்கப்பட்ட காட்சிகளைப் பார்த்த ரஜினி, மிகுந்த உற்சாகத்துடன் அடுத்த கட்டப் படப்பிடிப்புக்கு 20 நாட்கள் கால்ஷீட் கொடுத்துள்ளாராம்.இதுகுறித்து செளந்தர்யா கூறுகையில், இதுவரை எடுத்துள்ள பகுதிகளைப் பார்த்து அப்பா மிகவும் சந்தோஷப்பட்டார். இந்தப் படத்தைப் பொறுத்தவரை ஆரம்பத்திலிருந்தே என்னை மிகவும் உற்சாகப்படுத்தி வருபவர் அப்பாதான். அப்பாவை இன்னும் இளமையாக, புதிய ஸ்டைலில் இந்தப் படத்தில் பார்க்கலாம்.ஏற்கெனவே வெளியிடப்பட்ட சுல்தான் ட்ரெய்லருக்கு நல்ல வரவேற்பு கிடைத்துள்ளது. இதே வரவேற்பு படத்துக்கும் கிடைக்கும். இந்தியாவைப் பொறுத்தவரை, சூப்பர் ஸ்டார் ஒருவரை வைத்து எடுக்கப்பட்டிருக்கும் முதல் முழு நீள அனிமேஷன் படம் சுல்தான்தான்.இப்போது இறுதிக்கட்டப் படப்பிடிப்பில் இருக்கிறோம். அப்பா இதற்காக 20 நாட்கள் ஒதுக்கிக் கொடுத்திருக்கிறார். இந்த முறை படப்பிடிப்பு முழுக்க முழுக்க சென்னையில்தான் என்றார்.ஏவி.எம் மற்றும் பிரசாத் ஸ்டுடியோக்களில் இந்தப் படத்துக்காக பிரமாண்ட செட்கள் போடப்பட்டுள்ளன. க்ளைமாக்ஸில் ரஜினி பங்கேற்கும் போர்க்களக் காட்சிகளை லார்டு ஆஃப் த ரிங்ஸ்க்கு இணையாக அனிமேஷன் செய்யப் போகிறாராம் செளந்தர்யா.ஏற்கெனவே இந்தப் படத்துக்காக ஆறு பாடல்கள் போட்டுக் கொடுத்துவிட்டார் ரஹ்மான். ரஜினிக்கென்று ஸ்பெஷல் அறிமுகப் பாடலும் இதில் உண்டு.தமிழ்ப் புத்தாண்டுக்கு படத்தை வெளியிடத் திட்டமிட்டுள்ளார் செளந்தர்யா. சிவாஜியை மிஞ்சும் வகையில் உலகமெங்கும் ஆயிரத்து இருநூறு திரையரங்குகளில் இப்போதே சுல்தான் டிரெய்லர் காட்டப்படுகிறது. இதைவிட அதிக எண்ணிக்கையிலான திரையரங்குகளில் படத்தை வெளியிட திட்டமிட்டு வருகிறார்கள்.

எமது சுதந்திர இயக்கத்தின் அரசியல் இராஜதந்திர நகர்வுகளில் எனக்குப் பக்கபலமாக இருந்து செயற்பட்ட எமது தேசத்தின் ஒளிவிளக்கு இன்று அணைந்துவிட்டது. ஆலோசனை வேண்டி, ஆறுதல் தேடி ஓடுவதற்கு பாலாண்ணை இன்று என்னுடன் இல்லை. இவரது மறைவு எனக்கு மாத்திரமல்ல தமிழீழ தேசத்திற்கே இட்டு நிரப்பமுடியாத பேரிழப்பு.பிறப்பிற்கும் இறப்பிற்கும் இடையே விரியும் காலமாக மனித வாழ்வு நிலைக்கிறது. இந்த வாழ்வுக்காலம் எல்லா மனிதர்களுக்கும் ஒரே மாதிரியாக, ஒத்ததாக, ஒருசீராக அமைவதில்லை. காலச்சீரற்றதாக ஒருவருக்குக் கூடி, மற்றவருக்குக் குறுகி, இன்னொருவருக்கு அதிகம் நெடுத்து கூடிக்குறைந்து செல்கிறது. துரதிர்ஸ்டவசமாக, பாலாண்ணையினது வாழ்வு இடைநடுவில் நின்றுபோய்விட்டது. தீவிரம் பெற்றுள்ள எமது விடுதலைப் போருக்கு அவர் நிறையப் பணிகளை ஆற்ற வேண்டியிருக்கின்ற தருணத்தில் அவருக்கு மரணம் சம்பவித்திருக்கிறது. இதனை என்னால் ஏற்றுக்கொள்ளமுடியவில்லை. துயரத்தின் சுமை என் ஆன்மாவை அழுத்துகிறது. என் உள்ளத்தை உடைத்து, நெஞ்சத்தைப் பிளக்கிறது. கட்டுக்கடங்காத காட்டாறு போல சீறிப்பாயும் உணர்ச்சிப் பெருவெள்ளத்தை என்னால் வார்த்தைகளால் கொட்டமுடியாது. மனித மொழியில் இதற்கு இடமுமில்லை.பழக ஆரம்பித்த நாள் முதலே எமக்கிடையே ஒரு இனம்புரியாத புரிந்துணர்வு ஏற்பட்டது. அந்தப் புரிந்துணர்வால் எழும் பற்றுறவால் பிணைந்துகொண்டு, எமது உறவு நல்லுறவாக வளர்ந்து நட்புறவாகப் பரிணமித்தது. சிந்தனையாலும் செயலாலும் ஒன்றுபட்ட மனிதர்களின் சங்கமமாக அந்த உறவு மலர்ந்தது. தினம்தினம் நாம் பகிர்ந்துகொண்ட வாழ்பனுபவத்தில் வலிமைபெற்று வளர்ந்தது. சாதாரண மனித உறவுகளிலிருந்து இது முற்றிலும் வேறுபட்டது. காலத்தால் கனிந்து, வரலாற்றால் வடிவம் பெற்ற ஒரு அலாதியான இலட்சிய உறவு அது.பாலாண்ணையை நான் ஆழமாக நேசித்தேன். விடுதலை இயக்கம் என்ற மாபெரும் குடும்பத்தில் ஒரு மூத்த தலைமகனாக பிதாமகனாக மூன்று தசாப்தங்கள் வாழ்ந்தவர் அவர். நானும் அவரை அப்படித்தான் நோக்கினேன். ஒரு குடும்பமாக ஒன்றுசேர்ந்து ஒத்திசைவாக ஒன்றித்திருந்த நாட்களில் அவர் ஒரு சாதாரண மனிதப்பிறவி அல்ல என்பதைக் கண்டுகொண்டேன். மோசமாகச் சுகவீனமுற்று தினம்தினம் சாவோடு போராடியபோதும், தாங்கமுடியாத உடல் உபாதைகளால் வருந்திய போதும், தளர்ந்து போகாத உறுதிப்பாடு அவரிடம் இருந்தது. அவரின் இந்த இலட்சிய உறுதி எனது நெஞ்சத்தைத் தொட்டுநின்றது. அவர் துன்பத்தால் துவண்டபோதெல்லாம் எனது ஆன்மாவும் கலங்கியழுதது.எமது இயக்கத்தின் வளர்ச்சியிலும் அதன் இன்றைய விரிவாக்கத்திலும் பாலாண்ணைக்கு ஒரு நிரந்தரமான இடம் இருக்கிறது. ஒரு மூத்த அரசியல் போராளியாக, ஒரு மதியுரைஞராக, ஒரு தத்துவாசிரியராக எல்லாவற்றுக்கும் மேலாக எனது உற்ற நண்பனாக இருந்து எனக்கு ஊக்கமும் உத்வேகமும் அளித்தவர். ஆலோசனையும் ஆறுதலும் தந்தவர். எனது உணர்வுகளைப் பகிர்ந்துகொண்டு, எனது பழுக்களையும் பங்கிட்டுக்கொண்டவர். எமது விடுதலை இயக்கம் தோற்றம்பெற்ற ஆரம்பகாலம் முதல் என்னோடு இருந்து, எல்லாச் சோதனைகளையும் வேதனைகளையும் சவால்களையும் சங்கடங்களையும் தாங்கிக்கொண்டவர். எமது அரசியல் இராஜதந்திர முன்னெடுப்புக்களுக்கு மூலாதாரமாக, முன்னால் நின்று செயற்பட்டவர்.ஈழத்தமிழினம் பெருமை கொள்ளும் வகையில் அரசியல் உலகிலும் இராஜதந்திர உலகிலும் அளப்பெரும் சாதனைகள் புரிந்து, எமது தேசசுதந்திரப் போராட்டத்தை உலக அரங்கில் முன்னிறுத்திய பாலாண்ணையின் மாபெரும் போராட்டப்பணிக்கு மதிப்பளித்து "தேசத்தின் குரல்" என்ற மாபெரும் கௌரவப்பட்டத்தை அவருக்கு வழங்குவதில் நான் பெருமையடைகிறேன். பாலாண்ணை உண்மையில் எம்மைவிட்டுப் போகவில்லை. அவர் எமது நினைவலைகளில் என்றும் நீங்காத நினைவுகளாக நிலைத்து நிற்பார்.

புலிகளின் தாகம் தமிழீழத் தாயகம்

வே. பிரபாகரன்

தலைவர்

தமிழீழ விடுதலைப் புலிகள்